Қазақстан Республикасының орта білімді дамыту тұжырымдамасында білім беру саласының ең негізгі талабы: кең дүниетанымдық көзқарас, толық құзыреттілік, шығармашылық әрекетке бейім тұлға тәрбиелеу. Қазіргі уақытта қоғам мұғалімдерден жан - жақтылықты, іс-әрекетіндегі жүйелілікті, ізденушілік қабілеттерін, өз білімін жетілдіруге деген ынталылықты, әдістемелік шеберлікті талап етіп отыр. Мұғалімдердің осы талаптар тұрғысынан табылуы кәсіби даярлығын, шеберлігін шыңдайтын әдістемелік кеңес жұмысына байланысты. Әдістемелік жұмыс – мұғалімнің идеялық-саяси, ғылыми теориялық, кәсіби, мәдини дәрежесін жетілдіре беретін кешенді үрдіс. Әдістемелік жұмыс - үздіксіз білім алудың, бөлінбейтін құрамдас бөлімі. Әдістемелік жұмыс - мұғалімдер тарапынан өз мамандығын көтерудің, әдістемелік шеберлігін жетілдірудің ұдайы, кешенді, ұжым болып та, топталып та, жеке де жүргізілетін теориялық және практикалық жұмыс болып табылады. Әдістемелік жұмыс - мұғалім мен тәрбиешінің мамандығын жетілдіріп кәсіптік шеберлігін арттыруға, мектеп педагогикалық ұжымының творчестволық потенциалын дамытуға, оқу-тәрбие жұмысының сапасы мен тиімділігін жетілдіруге бағытталған өзара байланысты шаралардың тұтас жүйесі.