Халқымыздың бұрыннан келе жатқан тәрбиелік сөздерінің біразы мынандай:

Адамгершілікке, жалпы адамдық болмысқа, қарым-қатынастағы әрекеттерде жамау сияқты жараспайтын небір әдеттерден қашық бол.

* * *

Ата-анаңнан ешнәрсені жасырушы болма. Ойыңды оларға бүкпесіз айтуға үйрен. Ата-анаңды, еліңді қорға.

* * *

Уайым – жанның жегі құрты. Сондықтан уайымға салынбауға тырыс. Тез шешім қабылдауға дағдылан. «Тәуекел түбі жел қайық, өтесің де кетесің, Уайым түбі – тұңғиық, батасың да кетесің» деген бабалар.

* * *

Қай жерде болмасын өзіңнен үлкендерге ізет көрсетіп, жол бер, орын ұсын. Қарсы келме. Сәлем беруді ұмытпа.

* * *

Алдыңа мақсат қоя біл. Өзің ұнатқан іспен шұғылданған дұрыс.

* * *

Сөзінде тұрмайтын адамға жолама. Болашағыңа сен.

* * *

Жеке өмірңе байланысты мәселені қатысы жоқ адамдарға айту жөн болмайды. Бұл тәртіп қатаң сақталса, оңды болады.

* * *

Бағың байланып, бақытың қайтпасын десең, таңдайыңды қақпа. Саусағыңды сықырлатпа. Олай ету шайтанға қызмет еткенің.

* * *

Өсекшінің сөзіне мән бермеуді үйрен. Өсекшіге дос болдым дегенше, өміріңнен тыныштық кететіні ойыңда болсын. Болмашы мәселеге араласып, бас сұға беру жаман әдет.

* * *

Адамның айыбын оңашада өзіне жеке айтып түсіндіріп, түзу жолға түсуіне көмектесетін бол.

* * *

Өмірде шыншыл, табанды, әр қимылың өзгелерді таңғалдырардай батыл, әрі нық, қарапайым және жомарт бола білгенге не жетсін.

* * *

Зұлымдық жасау ойыңа кіріп те шықпайтын болсын.

* * *

Қонақпен еріп, құт келетіні, қонақтан қашқанан, құттың да қашатыны ойда болсын. Қонақ босағаны басып тұрмасын.

* * *

Жұмысқа құлшынысты арттырып, түйткілді істердің оңтайлы шешімін табу үшін, бос уақытты табиғат аясында өткізіп тұрған әсерлі нәтижелерге қол жеткізуге септігін тигізерін біліп жүр.

* * *

Шөбересінің алақанынан су ішкен ата мен әже бақилық өмірде жұмақтың төрінен орын алмақ. Әркімді сол жеткізсін!

* * *

Жақсы өнегелі адамдарға еліктеу жақсы қасиет екенін ұмытпа.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі