Қызғалдақтай құлпыра бер, Жеңіс-көктем!

Мамырда майда келіп жетті,

Мәңгілігі шырқап кетті

Күллі жаһан жүзіне.

Сәбише күл, балаша қуаң, Жеңіс-көктем!

Соғыс атаулы құрысын,

Қару біткен жойылсын,

Дұшпан, жендет, жау деген

Бейбіт күшімен тапталсын.

Төк жасыңды, жыла егіле, Жеңіс-көктем!

Отан үшін аттанды кеш-таңда,

Қыршынынан қиылды қан майданда.

Қара қағаз – зар үні,

Тоздырды елді күні-түні.

Орындары толмас сәйгүлік,

Аттары өшпес мәңгілік.

Бас иеміз, баба-аруақ, сіздерге!

Күн шуақтай жылыта бер, Жеңіс-көктем!

Ардагерлер тұрды сапқа –

Сұм соғысты олар көрген,

Қиын-қыстау лебін сезген,

Қиналғанға көмек берген,

Бейбітшілік шоғын терген,

Бір туыстай қалмай ерген,

Фашизмді мұрттай перген –

Уа, ғаламат! Уа, жаратқан!

Ардагерлер жасасын!!!

Жарқын өркениет кепілі, Жеңіс-көктем!

Берлин бүгін қандай сәнді,

Мәскеу жатыр шырқап әнді,

Волгоград, Минск, Киев халқы

Қуантып жүр жан мен тәнді.

Бейбіт ғасыр серт береді, Жеңіс-көктем!

Отты жылдар ұмытылмас,

Ардагерлер тыста қалмас.

Соғыс-жалын ұшқын алмас,

Ақ көгершін мәңгі талмас!