29. Адамзаттың ең ардақтысы 5 жан

Суфян Сәури былай дейді: «Жаратылыстың ең ардақтысы бес адам:

1) Дүниені тәрік еткен ғалым;

2) Сопылық жолын ұстанған факиһ;

3) Кішіпейіл бай;

4) Шүкір етуші кедей;

5) Сүннетті ұстанған адал адам».

30. Бес нәрсе нәпсінің болмысынан

Сәһл ибн Абдулла былай дейді: «Бес нәрсе жақсы саналған нәпсінің сипатынан:

1) Кедей болса да дәулетті көріну;

2) Қарны аш болса да тоқ көріну;

3) Қайғырып тұрса да қуанышын көрсете білу;

4) Бір кісімен арасында дұшпандық болса да махаббатын көрсете алу;

5) Күндіз ораза ұстап, түнде намаз оқыса да әлсіздігін көрсетпеу».

31. Абзал адамның 5 қасиеті:

1) Аллаға деген құлшылығына, ғибадатына берік;

2) Адамдарға пайдасы тиетін;

3) Адамадр одан зиян шекпейтін;

4) Адамдардан еш нәрсе дәметпейтін;

5) Өлімге дайындалып жүретін адам.

32. Алланы зікір етудің 5 пайдасы:

1) Алланың разылығына бөлейді.

2) Құлшылыққа деген белсенділігі артады.

3) Алланы еске алып жүру арқылы шайтанның азғыруынан қорғалады.

4) Жүректі жұмсартады.

5) күнә істен алшақ етеді.

33. Екі дүниенің бақытына жеткізетін 5 сөз

Абдулла ибн Амр ибн Ас (р.а.) былай деген екен: «Кімде-кім мына бес сөзді айтса екі дүниеде бақытты болады:

1) Әрдайым «Лә илаһа иллаллаһ Мұхаммадур-расулаллаһ» сөзін айтып жүру. (Пайғамбарымыз (оған Алланың салауаты мен сәлемі болсын): «Кез келген жағдайда Алла Тағаланы көп зікір етіңдер (еске алыңдар). Өйткені одан асқан Аллаға сүйкімді әрі пендені екі дүниеде күнәдан құтқаратын амал жоқ», - дейді).

2) Бір бәлеге, сынаққа душар болса, «Иннә лиллаһи уә инна иләйһи ражиғун, уә лә хәула уа лә қуаатә иллә билләһил-алийл-азим» деп айту. (Пайғамбарымыз (оған Алланың салауаты мен сәлемі болсын): «Алланы зікір етуден басқа сөзді көбейтпеңдер. Расында, көп сөз жүректі қатайтады. Ал қатайған жүрек адамдарды Алланың рахметінен алыстатады», - дейді).

3) Нығмет берілсе шүкірлік ретінде «Әлхамдулилләһи раббил-аламин» деу. (Пайғамбарымыз (оған Алланың салауаты мен сәлемі болсын): «Аллаға ең сүйкімді сөз төртеу: «Субханаллаһ, уәлхамду лиллиаһ, уә лә иләһә иллаллаһ, уәллаһу акбар», - дейді).

4) Бір істі бастарда «Бисмиллаһир-рахманир-рахим» деп бастау. (Пайғамбарымыз (оған Алланың салауаты мен сәлемі болсын): «Бисмилләсіз басталған әрбір іс – берекесіз», - деген).

5) Бір қателікке, күнәға ұрынғанда «Астағфираллаһал-азим уа әтубу иләйһи» деп айту. (Пайғамбарымыз (оған Алланың салауаты мен сәлемі болсын) былай дейді: «Кім үнемі «истиғфар» сөзін айтып жүрсе, Алла Тағала оны әрбір қиыншылықтан құтқарады, әрбір қайғысын сейілтеді және ойламаған жерден ризыққа кенелтеді»).

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі