БАТА-ТІЛЕКТЕР

Халық бата-тілегі

Үй иесіне бата

Өрістен қайтып жамырасқан,

Шуылдасып маңырасқан.

Қошақанның енесі,

Қоңыр қой толсын қораңа!

Тұяқтары сартылдап,

Мүйіздері жалтылдап.

Бұзаулардың енесі,

Сиыр толсын қораңа!

Шудаларын шаң басқан,

Екі өркешін қом басқан.

Ботақанның енесі,

Інген толсын қораңа!

Құйрық-жалы төгілген,

Шапса көбесі сөгілген.

Құлыншақтың енесі

Бие толсын қораңа!

Әумин!

* * *

Сақтық бата

Дұшпанның табысынан сақта,

Достың наласынан сақта.

Өмір бойы жазылмайтын,

Жүректің жарасынан сақта.

Шарасыз шерменде болғаннан сақта,

Мезгілсіз солғаннан сақта.

Ағайынға көзтүрткі болып,

Сүмірейтіп сатып кеткеннен сақта.

Сенгенің сатып кеткеннен сақта,

Дұшпан алдында шөккеннен сақта.

Қарғап-сілеп тамам жұрт,

Қаһарын төккеннен сақта.

Үгіліп жылағаннан сақта,

Араша сұрағаннан сақта.

Амалың құрып есеңгіреп,

Қайтып тұрмастай құлағаннан сақта.

Кесапаттың зәрінен сақта,

Патшаның кәрінен сақта.

Қол жайып тілеген пендеңді,

Пәле-жаланың бәрінен сақта.

Әумин!

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі