Халқымыздың бұрыннан келе жатқан тәрбиелік сөздерінің біразы мынандай:

Білімге көңіл бөлсең, қор болмайсың.

* * *

Қалтаңыз бен әмияныңызда керексіз мыжылған заттардың болмауын қадағалаған жөн болады. Олардан арылған дұрыс.

* * *

Ішімдікке, шылым шегуге тыйым екенін де еш ұмытпа!

* * *

Мүсәпірге садақа беруден кедейленбейсің, сондай-ақ, жетімге қолқайыр берсең, ал байлығыңнан шүлен үлестірсең қайырымына кенелесің. Сағынған адамыңа сәлемдеме жіберсең жеңілденесің.

* * *

«Той – Құдайдың қазынасы» деп бекер айтпаған. Тойға сый-сияпат жасасаң, кезі келгенде қайтатын өз мүлкіңе санай беруіңе болады.

* * *

Диқаншылықтың атадан қалыптасқан салтында айналадағы бақша өнімдерін екпейтін малшы қауымға тоғыз тарту рәсімі бар. Әр қапқа не қоржынға тоғыздан іріктеліп, көз тартар қауын-қарбыдардан салып, үйлеріне жеткізеді. Тоғыз тартылған үй иесі, диқаншылығына береке тілеп, жоралғысын жасайды. Мұндай алыс-берістен достық нығаяды.

* * *

Сыртқаттанған адамның көңілін сұрау, қалжыраған қарттардың қал-жағдайын, жетімнің жай-күйін, саудың амандығын біліп тұру адамгершіліктің биік шыңы екені ойда болғаны жөн.

* * *

Отау құрған жастарды шақырып, отыңмен таныстыру, жас босанған анаға қалжа жегізу парызың екенін ұмытпа.

* * *

Түскен олжадан тәбәрік берсең, берекең артар, қонақтан бұйымтай білсең, орында, ризалығын алып қайтар.

* * *

Болашаққа сеніммен қара, өткенге – салауат ет, қолыңдағыға береке тіле. Ала жіпті аттама.

* * *

Жасы кішілерге үлкендерді сыйлап, алдарынан кесіп өтпей, сәлем беріп жүру парыз есебінде саналуы тиіс.

* * *

Жасы үлкен ақсақалды кісілерден қарғыс емес, алғыс алуға бейімделу керек. Олардың ақ батасын алған жастардың болашақтары жарқын боларына сенімің болсын.

* * *

Тірі адамның үстінен бүтін киімін дар еткізіп жыртып, айыра салып шешу – нағыз масқара іс. Оның кесапаттыққа апарарын білетін бол.

* * *

Жылқының тектілігінен болар, тұлпардың басын бабаларымыз тудай қастерлеген. Кесірге ұшырамас үшін аттың басына қамшы тигізбеген. Құлынды тепсең, құрығың құтаймайды деген де бар. Сондай-ақ, бие туғанда құлынды алтын басты деп, оның серігі – шуын аяқ асты етпей, итке жегізбей, жерге көміп тастайтын ырым бар.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі