ҮШ АРСЫЗ, ҮШ ҒАЙЫП, ҮШ ЖЕТІМ

Ноғайлының ханы Жәнібек халықты жинап:

- Үш арсыз, үш ғайып, үш жетім болады, соны кім табады? – деп сұрапты. Жиналған халық көп дағдарып:

- Үш арсыз: ұйқы арсыз, күлкі арсыз, тамақ арсыз. Үш ғайып: қонақ ғайып, несібе ғайып, ажал ғайып, - деп шешіпті. Бірақ үш жетімді ешкім таба алмапты. Сонда Жәнібек хан:

- Елде келмеген кім қалды? - деп сұрапты.

- Келмеген Қарабас шешен қалды, - дейді халық. Жәнібек Қарабасты шақыртып алып, әлгі сөздің шешуін содан сұрапты.

Сонда Қарабас шешен:

- Жетім үшеу емес, бесеу еді ғой, - депті де:

- Оты жоқ жер жетім,

Басшысы жоқ ел жетім.

Елінен ауған ер жетім,

Тыңдаусыз сөз жетім,

Жоқтаусыз қыз жетім, - деген екен.