БОЗІНГЕН

Қазақта бозінген туралы аңыздар көп. Сыбызғышылар арасында мынадай аңыз көп тараған:

...Баяғыда Бағланбай деген бай болыпты, малының құты Бозінген екен. Сол Бозінген басы алтын, құйрығы күміс бота туады. Бағланбайдың бақташысы соған қызығып ботаны керуеншілерге сатып жіберіпті, оны иесіне айтпапты. Содан Бозінген ботасын жоқтап жылайды.

Жаралғаннан жасымнан,
Күйіп, жанып сабылдым.
Тартып беру бала үшін,
Үстіме кілем жамылдым.
Көрер күнім бар ма екен,
Мен ботамды сағындым.

Керуеншілердің қолына түскен Бозінген ұшқан құстардан ботасының дерегін сұрап зарланады, көзінің жасын көлдетеді. Оның зарлаған дауысы Бағланбайдың екі ұлының құлағына жетеді, олар керуенді қуып жетіп ботаны қайтарып алады.