ҒАШЫҚТЫҚ СҰЛУЛЫҚТЫ ТАЛҒАМАЙДЫ

856 >>

Көзге түсер ер салсам бай көк дөнен,

Аралайын ауылыңды тай көкпенен,

Бірге жүріп, бірге өскен, беу, қалқатай,

Сағынғанда қараймын әйнекпенен.

857 >>

Жорғалайды көк ала малдың басы,

Етекке саудыраған сайдың тасы,

Кеткенде ауылың алыс, әй, қарағым,

Көл болар омырауға көздің жасы.

858 >>

Ақ тісің аузыңдағы маржан тісің,

Болар ма мұндай душар сүйген кісім,

Сүйкеніп сүйген кісім өте шықса,

Қазандай қатты от жаққан қайнайды ішім.  

859 >>

Шыт шұлғау, шүберек байпақ, кәзелі етік,

Мәскеуден кидім бешпент дөңгелентіп,

Даусыңды естігенде бұлбұл құстай,

Қараймын жан-жағыма елең етіп.

860 >>

Жан қалтама салғаным он екі құрт,

Қалқатайдың ауылын көрдің бе жұрт,

Қалқатайдың ауылын көрген болсаң,

Сүйіншіге берейін орамал шыт.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі