ҒАШЫҚТЫҚ СҰЛУЛЫҚТЫ ТАЛҒАМАЙДЫ

826 >>

Әуеден ұшып жүрген ала қаздай,

Айырылған үйірінен бала қаздай,

Кеткенде ауылың алыс, ей, қарағым,

Нәр татпан сені ойлап ала жаздай.

827 >>

Әуеден ұшып жүрген ақ кекілік,

Үзді ғой шідерімді ат секіріп,

Кеткенде ауылың алыс, ей, қалқатай,

Үш тұрып, үш отырдым қатты өкініп.

828 >>

Әуеде ұшып жүрген ұлар ма екен,

Баласын атып алсам жылар ма екен.

Кеткенде ауылың алыс, ей, қарағым,

Өлеңге өстіп қоссам ұнар ма екен.  

829 >>

Әуеде ұшып жүрген қара инелік,

Ұшады қара инелік зар иленіп,

Кеткенде ауылың алыс, ей, қарағым,

Қалды ғой қабырғама қан иленіп.

830 >>

Әуеде ұшып жүрен сары ала қаз,

Айдын көлдің ортасы көкорай саз,

Сен іздесең, қалқатай, мен сұраған,

Күліп-ойнап қалайық бір-екі жаз.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі