ҒАШЫҚТЫҚ СҰЛУЛЫҚТЫ ТАЛҒАМАЙДЫ

811 >>

Базардан алып келген білте шам-ай,

Бидай өңді ақ құба құдашам-ай,

Сірә, менің көңілім басылар ма,

Сақиналы қолыңнан ет асамай.

812 >>

Базардан алып келген қызыл кіліт,

Шығады күн батарда қызыл бұлыт,

Кеткенде ауылың алыс, ей, қарағым,

Елесің көз алдымнан болмас ұмыт.

813 >>

Базардан алып келген темір шелек,

Ойнаған мен күлгенің жаннан бөлек,

Ауылың алыс кеткенде, уай, қарағым,

Айналайын көзіңнен дөп-дөңгелек.  

814 >>

Зергер бұйым соғады қалайыдан,

Аққан тері сорғалап самайынан,

Көңіліңе бір сенің қараймын деп,

Сендейлердің айрылдым талайынан.

815 >>

Біздің ауыл ақсайдың қақ басында,

Күміс жүген жарқылдар ат басында,

Көңілің шыныменен болса менде,

Жанат ішік жамылып жат қасымда.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі