ҒАШЫҚТЫҚ СҰЛУЛЫҚТЫ ТАЛҒАМАЙДЫ

796 >>

Жылқыда екі торы сор жалаған,

Аяғын ақсай басып жорғалаған,

Кеткенде ауылың алыс, ей, қарағым,

Қойныма көзім жасы сорғалаған.

797 >>

Жылқысы біздің елдің ала мойын,

Су ішіп айдын көлде салады ойын,

Сүйеніп тал құрыққа тұрғанымда,

Қалқада әрқашанда болады ойым.

798 >>

Жылқы бақтым сары жон белесіне,

Етектегі түседі ел есіме,

Сары белден шырқаған даусымды естіп,

Сүйген сәулем, қасыма келесің бе?  

799 >>

Жылқымды айдап салдым шөпті көлге,

Жаюшы ек үкі тағып бесті керге,

Кеткенде ауылың алыс, беу, қарағым,

Бармайды айтуға аузым кетті дерге.

800 >>

Жылқы ішінде жүрелік домбыра алып,

Бір шеберге тиегін жондыралық,

Шын көңіл, шын пейілің менде болса,

Екі ауылды бір жерге қондыралық.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі