ҒАШЫҚТЫҚ СҰЛУЛЫҚТЫ ТАЛҒАМАЙДЫ

751 >>

Көзіңнен, айналайын, телміруі-ай,

Суындай тас бастаудың мөлдірім-ай,

Ішінде шаршы топтың жарқ-жұрқ еткен,

Айшықты Алатаудай белгілім-ай.

752 >>

Көзіңнен айналайын күлімдеген,

Оғаштық тал бойыңнан білінбеген,

Мінезің неткен жақсы майда қоңыр,

Сыртыңнан көрген адам «күнім» деген.

753 >>

Көзіңнен айналайын жайнап тұрған,

Өлеңге бұлбұл құстай сайрап тұрған,

Жігітке бұл жалғанда арман болмас,

Бұралтып бір өзіңмен ойнап тұрған.  

754 >>

Көзіңнен айналайын оймылдаған,

Не сақтап, нені қалқа қойдың маған,

Қарағым, қандай жанды жарылқайсың,

Пенде жоқ бір өзіңнен ой қылмаған.

755 >>

Көзіңнің айналайын қарасынан,

Қасыңның хат жазайын арасынан,

Үстіңнен асыл бешпент шешіп берген,

Қолыңнан айналайын саласынан.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі