ҒАШЫҚТЫҚ СҰЛУЛЫҚТЫ ТАЛҒАМАЙДЫ

746 >>

Көзіңнен айналайын күлімдеген,

Артыңнан басқан ізін білінбеген,

Ойымда үш ұйықтасам бар ма менің,

Айрылып сенен, сәулем, жүрем деген.

747 >>

Көзіңнен айналайын, аймалайын,

Қолыңа ақ сағаттай байланайын,

Бергенде өзің көңіл, ей, қалқатай,

Иіскеп ақ төсіңнен аймалайын.

748 >>

Көзіңнен айналайын, қалқатайым,

Келмейді сенсіз жерде менің жайым,

Гүл жайнап көз алдымда сен тұрғанда,

Басқаның күн мен айын не қылайын.  

749 >>

Көзіңнен айналайын күлімдеген,

Тал бойынан ешбір мін білінбеген,

Көңіліме ұялап көгершіндей,

Жатсам көзім түн бойы ілінбеген.

750 >>

Көзіңнен айналайын күліп тұрған,

Жағдайды айтқызбай біліп тұрған,

Тәңірге күндіз-түні айтам алғыс,

Кезінде бір өзіңмен жолықтырған.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі