ҒАШЫҚТЫҚ СҰЛУЛЫҚТЫ ТАЛҒАМАЙДЫ

731 >>

Қарағым, айналайын, қандай едің,

Құрбыңның өзің теңдес маңдайы едің,

Өзіңмен күліп-ойнап жүрген шақта,

Қол жеткен мұратыма жандай едім.

732 >>

Қарағым, айналайын, қырғи қабақ,

Сен едің суда жүзген алтын шабақ,

Салсам да күміс қармақ ілінбейсің,

Қайтейін қылығыңды, беу, ақтамақ.

733 >>

Қарағым, айым да сен, күнім де сен,

Қасқа тісің ақсияр күлімдесең,

Ай мен күндей жанымда сен жүргенде,

Ауыт басып, адасып сүрінбес ем.  

734 >>

Қарағым, айналайын, ұтымыңнан,

Құмырсқа бел үзілген мықыныңнан,

Бағаласам бағаңа жан жетпейді,

Қандай жанның жаралдың тұқымынан.

735 >>

Қарағым, айналайын, қасың керік,

Мал болсаң алар едім бәсін беріп,

Мен саған басыбайлы бол демеймін,

Жүрсеңші азғантай күн қасыма еріп.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі