ҒАШЫҚТЫҚ СҰЛУЛЫҚТЫ ТАЛҒАМАЙДЫ

726 >>

Қалқатай, ойым бөлек сен дегенде,

Сен қандай күйде екенсің мен дегенде,

Тіліңнен аузыңды ашып бір сүйгізсең,

Болар-ау мың күн сусын шөлдегенде.

727 >>

Қалқатай, сен дегенде қандай болдым?

Байланған атып бөкен сондай болдым,

Кеткенде ауылың алыс, жерің шалғай,

Айрылған үйірінен қаздай болдым.

728 >>

Қалқатай, келдің қайдан, кеттің қайдан,

Ала үйрек алма мойын ұшар сайдан,

Кеткенде ауылың алыс, ей, қарағым,

Жетер ме айтсам сәлем тұрымтайдан.  

729 >>

Қалқатай, сен ар жақта, мен бер жақта,

Шұлғиды кер арғымақ бау шарбақта,

Қолымда құнан атан шүйіншім бар,

Ауылы қалқатайдың дәл қай жақта.

730 >>

Қарағым, айналайын, асылым-ай.

Ойнар ма едім асылмен асылып-ай,

Ойнай қалсам асылмен асылып-ай,

Қалсын ақша төсекте шашылып-ай.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі