ҒАШЫҚТЫҚ СҰЛУЛЫҚТЫ ТАЛҒАМАЙДЫ

721 >>

Айналайын, қарағым, хал жақсы ма?

Сала берме көзіңді бар жақсыға,

Сала берсең көзіңді бар жақсыға,

Бәрі жақсы көрінер алғашқыда.

722 >>

Айналайын, ақ жүзің айдан аппақ,

Сендей жанды ер жігіт қайдан таппақ,

Көрген адам қасыңнан кете алмайды,

Мұз үстінде жүргендей тайғанақтап.

723 >>

Қалқатай, неге отырсың, өлеңдетпей,

Өлеңдетіп қалайық заман өтпей,

Гүл жазыңның барында ойна да күл,

Албыраған ақша бет нұры кетпей.  

724 >>

Қалқатай, сен дегенде болдым ынтық,

Арадағы дұшпанға тисін мылтық,

Қағидаңа берік бол мен сендікпін,

Көре алмаған көп дұшпан жүрсін сүйтіп.

725 >>

Қалқатай, сен дегенде неден жаздым,

Сабағын сары қурайдың белден қаздым,

Кеткенде ауылың алыс, ей, қалқатай,

Сарғайып сағынғаннан өлең жаздым.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі