БЕС АҒАШТАН ЕР ҚОСТЫМ ҚИЫСТЫРЫП

686 >>

Қазығұртты жағалай тас болады,

Шын азамат үйіне бас болады,

Көрінгенмен жылтырап сыртым бүтін,

Ішім жанып, көзіме жас толады.

687 >>

Ұлы жұртты жағалай тал болады,

Ашылмаса көңілім дал болады,

Қасіретті қайғысы басқа түссе,

Айдын көлге үйрек-қаз зар болады.

688 >>

Білте бермен, тағы да, білте бермен,

Қолаң қара шашың бар күлтеленген,

Көмекейің көсілген ақын болсаң,

Қара дауыл өлеңді сілте бермен.  

689 >>

Ақ қалады, ендеше, ақ қалады,

Аттың басқан жерінде дақ қалады,

Оралыңның барында ойна да күл,

Өлгеннен соң саудырап жақ қалады.

690 >>

Ана беттен жол еді мына бетке,

Сөйлеспедім өзіңмен шығып шетке,

Қайсыбірін айтайын ай-ау, сәулем,

Енді кетіп барасың тұрмай сертке.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі