БЕС АҒАШТАН ЕР ҚОСТЫМ ҚИЫСТЫРЫП

681 >>

Қыз қосылса теңімен жыламасын,

Көздің жасын көл қылып бұламасын,

Екі жасты бақытты ете көр деп,

Біздер бата берелік сұрағасын.

682 >>

Күнде жылау, бөпем-ау, күнде жылау,

Иіс маймен денеңе бердім сылау,

Сен жыламай, бөпем-ау, кім жылайды,

Асырайтын әкеңнің сиқы мынау.

683 >>

Жолаушы жолға шығар қосыменен,

Шөлдесе шай қайнатар мосыменен,

Осы үйде таң атқанша ән шырқадым,

Әнімді тоқтатайын осыменен.  

684 >>

Жолықсаң біздің жақтың тентегіне,

Өмірдің қарамайды келтеңіне,

Қонаққа жалғыз атын сойып беріп,

Жүген ұстап қалады ертеңіне.

685 >>

Мен айтайын сөзімді өлең етіп,

Өмір сүрсін жас ұрпақ көлеңдетіп,

Бас қосқаны қауымның той емес пе,

Отырайық бәлсінбей өлеңдетіп.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі