БЕС АҒАШТАН ЕР ҚОСТЫМ ҚИЫСТЫРЫП

676 >>

Қияның қияласа қиясы бар,

Етекте орып алса миясы бар,

Көңілді көтерейік бас қосқанда,

Өлеңнің таңдайымда ұясы бар.

677 >>

Мен өзім ақын емес, өрнек едім,

Дидарын жақсылардың көрмек едім,

Жиылып үлкен-кіші бас қосқанда,

Азырақ тамашалап бермек едім.

678 >>

Көгілдірік ендеше көгілдірік,

Көк дөненге жарасар өмілдірік,

Бізге салған қолқаңыз өлең болса,

Біз айтайық өлеңді төгілдіріп.  

679 >>

Жезім деймін, ендеше, жезім деймін,

Өлең айтып отырған өзім деймін,

Айтар болсаң өлеңді бүгін айтқын,

Бүгіннен соң келмейді кезім деймін.

680 >>

Дүние өте шығар басымыздан,

Бала едің әдеп көрген жасыңыздан,

Он бес пен жиырманың арасында,

Кетпейді келген құрбы қасыңыздан.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі