БЕС АҒАШТАН ЕР ҚОСТЫМ ҚИЫСТЫРЫП

646 >>

Ажарың ақ түлкінің ажарындай,

Жаманға салма, Құдай, назарымды-ай,

Ауылыңнан қыз кеткен соң қызық кетер,

Тарқаған Қояндының базарындай.

647 >>

Жігіттер, неге отырсың өлеңдетпей,

Қалыңдар өлеңдетіп заман өтпей,

Қызығы бұл жалғанның ойнап-күлген,

Бір шылбыр, екі тізгін қолдан кетпей.

648 >>

Отырсың ағаш үйдің бөлмесінде,

Жақсының иман тұрар кеудесінде,

Жастығың бұл өмірде бір-ақ келер,

Мен кепіл бір өткен соң келмесіне.  

649 >>

Ақ самаурын қайнайды шүмегі алтын,

Қатар жүрген құрбыңмен болма салқын,

Қатар жүрген құрбыңмен болсаң салқын,

Бұрынғыдай болмайды көңілің жарқын.

650 >>

Қарағайлы дегенде, қарағайлы,

Қарағайлы көп жылқы аралайды,

Жақсы-жайсаң осындай бас қосқанда,

Бекер қарап отырған жарамайды.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі