БЕС АҒАШТАН ЕР ҚОСТЫМ ҚИЫСТЫРЫП

626 >>

Сұрасаң менің атым Қалқатаймын,

Болсам да малға кедей, әнге баймын,

Өкшесі қара етіктің қарыс сүйем,

Болсам да өзім кедей, қыз таңдаймын.

627 >>

Баяғыда бай өткен, жарлы да өткен,

Жиырма бес басымыздан қарғып өткен,

Жайраңдашы, жігіттер, тіршілікте,

Мақсатына ойлаған әркім жеткен.

628 >>

Қазығұрттың етегі тас болады,

Шын азамат үйіне бас болады,

Көрінгенмен жылтырап сыртым бүтін,

Ішім жанып, көзіме жас толады.  

629 >>

Өзгеріп дүркін-дүркін ел де өтеді,

Ауырса дерт те адамды меңдетеді,

Жиылып өңшең жақсы бас қосқанда,

Жел сөзді сөйлеп берсем нем кетеді.

630 >>

Басында жәрмеңкенің күнде жиын,

Жел сөзді қиыстырса несі қиын,

Өлең мен өнерімді бұлдайын ба,

Көрсетіп отырғанда халқым сыйын.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі