БЕС АҒАШТАН ЕР ҚОСТЫМ ҚИЫСТЫРЫП

616 >>

Қызды неге бұлай ғып жаратасың,

Қолаң шашын қайырып таратасың,

Асау тайдай алшақтап жүрген басым,

Қандай жанның қолына қаратасың.

617 >>

Бұл үйде құралай көз, қиғаш қастар,

Ай нұрлы, алма мойын, сүмбіл шаштар,

Құдайым жақсы күні кездестірді,

Бас қосу құтты болсын, замандастар.

618 >>

Ай десеңіз айтайын айдай он бес,

Асауынан үйреткен тайдай он бес,

Тіршіліктің барында ойна да күл,

Қайта айналып оралмас қайран он бес.  

619 >>

Тай құлаша, дегенде, тай құлаша,

Суда балық өлмей ме жар құласа,

Көрмегелі көп айдың жүзі болды,

Есен-аман жүрмісің-ай, құдаша

620 >>

Дүние ойлап тұрсам жалған екен,

Күлмеген, ойнамаған арман екен,

Аққумен аспандағы ән қосушы ем,

Дауысым әнге келмей қалған екен.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі