БЕС АҒАШТАН ЕР ҚОСТЫМ ҚИЫСТЫРЫП

596 >>

Айт дегенде өлеңді аяр болмас,

Жамандардың сөзінде баян болмас,

Осындайда шырқап қал, құрбы-құрдас,

Күнде мұндай тамаша даяр болмас.

597 >>

Арқар-құлжа деген соң, арқар-құлжа,

Атып алсам құлжаны терісі олжа,

Бұл жалғанда жастарым ойнап-күлсін,

Ойнап-күлсе өзіне тегін олжа.

598 >>

Екі ауылдың арасы діңгіл соқпақ,

Ине қазық болғанда, түйме тоқпақ,

Көргенімше өзіңді тағат таппай,

Әнім еді салатын сені жоқтап.  

599 >>

Айтамын айт дегенде енді нені,

Ілдірдім қырғи салып бөденені,

Тұнжырап төмен қарап отырғанша,

Құралық өлең айтып әңгімені.

600 >>

Шүйгін жерге мал жайсаң өрістейді,

Жолдасқа жаман адам келіспейді,

Өлеңді айтар болсаң дұрыстап айт,

Сөзіңді тыңдаған жұрт теріс дейді.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі