БЕС АҒАШТАН ЕР ҚОСТЫМ ҚИЫСТЫРЫП

561 >>

Құбажайға салайын баяулатып,

Мал табады ер жігіт жаяулатып,

Алты қырдың астынан ән шырқасам,

Дәтің қайтып шыдайды ояу жатып.

562 >>

Құбажайға салайын ырғатылып,

Кескен қайың қалады қиратылып,

Тіршілікте, жігіттер, күл де ойна,

Өтіп дәурен барады шұбатылып.

563 >>

Айт дегенде өлеңді үстеуші едім,

Тоят алмай тұғырдан түспеуші едім,

Теңбіл көктің баласы затым тұлпар,

Тұнық судан басқаны ішпеуші едім.  

564 >>

Тағы да әуел ызғар, әуел ызғар,

Жел тұрса терістіктен бетің мұздар,

Бас қосып осындайда кездескенде,

Өлеңді бес-алты ауыз айтыңыздар.

565 >>

Той бастаңдар, әлеумет, той бастаңдар,

Той бастаған, әлеумет, көп жасаңдар,

Сәтті күні сәрсенбі, той жасапсың,

Құтты болсын тойыңыз деп бастаңдар.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі