БЕС АҒАШТАН ЕР ҚОСТЫМ ҚИЫСТЫРЫП

551 >>

Дауысым а дегенде жөнеледі,

Әнімді тыңдаған жан кенеледі,

Әлеумет, осындайда ойна да күл,

Қолыңнан қартайған соң не келеді.

552 >>

Сөйлеп-сөйлеп тастайын сөз келген соң,

Сөйлесін деп құдайым сөз берген соң,

Мұнда айтпаған өлеңді қайда айтамын,

Жиналып өңшең бағлан кез келген соң.

553 >>

Тобылғыдан сайладым таяғымды,

Жаңа бастап келемін баяғымды,

Күннің суық болғаны маған жақсы,

Қыздар қымтап салады аяғымды.  

554 >>

Үлкені ауылымның Қожаберген,

Құр дауыс неге керек соза берген,

Баласы теңбіл көктің мен қазан ат,

Артымнан айғай шықса оза берген.

555 >>

Өте ме күміс кездік жанымаған,

Бермейді тұрып орын танымаған,

Кісінің сыйласқандай баласы едік,

Келмесін жаман атың, жаным маған.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі