БЕС АҒАШТАН ЕР ҚОСТЫМ ҚИЫСТЫРЫП

546 >>

Әуеде бұлт көшеді жел айдаса,

Тәуекел қиын емес, бел байласа,

Көңілді өлең айтып көтерелік,

Жігітті қайғы басар ой ойласа.

547 >>

Ай туса жарқырайды жанарыңыз,

Ауырар жаяу жүрсек табанымыз,

Бозторғай қой үстіне ұя салды,

Дейтұғын енді туды заманымыз.

548 >>

Ұстағаным қолыма алтын құрық,

Ақ сұңқарды ұшырдым талпындырып,

Бас қосқанда өлеңді біз айтайық,

Бізден бұрын өткеннің салтын құрып.  

549 >>

Сізден де өтер дүние, бізден де өтер,

Мұратына кей ғашық жылдам жетер,

Бажайына бажайлап келтіргенше,

Сырғанап сұм дүние тез-ақ өтер.

550 >>

Қалқам-ау, сөйле десең мен сөйлейін,

Тәңірден тағдыр кесе жөнелейін,

Қолқаңыз маған салған өлең болса,

Тасындай диірменнің дөңгелейін.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі