БЕС АҒАШТАН ЕР ҚОСТЫМ ҚИЫСТЫРЫП

511 >>

Айт дегенде өлеңді іркілмеймін,

Жақсы көрген адамды шіркін деймін,

Көпшіліктің алдында ән салғанда,

Жолға түскен жорғадай бүлкілдеймін.

512 >>

Қазақтың қазынасы қойдың жүні,

Жылқының ең қызығы жаздың күні.

Арналған түйе малы артуыңа,

Озады ешкі, сиыр күздің күні.

513 >>

Айналайын қарағым, жүрсің бе аман,

Өзім көрген аман ба, бала-шағаң,

Көрмегелі жүзіңді көп күн болды-ай,

Сәлем жолдап жүруші ем мен де саған.  

514 >>

Қыран бүркіт ұшады қиялдауға,

Шешен жігіт сөйлейді қия дауда,

Тілеп ұшқан Алтайдан сұңқар едім,

Қай жеріне қонайын ұялауға.

515 >>

Алма мойын ала үйрек ұшар сайдан,

Бозторғайдың ажалы күйкентайдан.

Өлеңіңді сағынып жүргенімде,

Қиылған қас, қыпша бел келдің қайдан.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі