БЕС АҒАШТАН ЕР ҚОСТЫМ ҚИЫСТЫРЫП

501 >>

Ұшады бір топ қаздар үйрегімен,

Қонады ұшып барып түйдегімен,

Бәйгені жүйрік болсаң ал да жөнел,

Қалайық бір қосылып бүйрегінен.

502 >>

Болмайды шапқан бірдей желгенменен,

Шеніме ешбір нәрсе тең келмеген,

Жүйрікті көрмей сырттан кім мақтайды,

Өнерін айдалада ел көрмеген.

503 >>

Сары белден сарғайып таң келеді,

Жүйрік аттың соңынан шаң келеді,

Айт дегенде өлеңді қоя бермей,

Менменсіген кейбіреу паң келеді.  

504 >>

Бүгін тойға құрбылар келіп еді,

Құрбылармен көңілдің семірмегі,

Сағынысқан шын құрбы келгеннен соң,

Келеді ғой сұлу ән көңілдегі.

505 >>

Қолымда бір қамшым бар бунақтаған,

Басыңа таққан үкім бұлғақтаған,

Ән салып, жылқы бағып қырға шықсам,

Астымда мінген атым ойнақтаған.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі