БЕС АҒАШТАН ЕР ҚОСТЫМ ҚИЫСТЫРЫП

486 >>

Біздерде өлең де бар, өнер де бар,

Жылқыда мінілмеген дөнен де бар,

Өлеңді әлдебіраз айтып-айтып,

Үйіңе таң атқан соң жөнел де бар.

487 >>

Тобылғыдан үй салдым сынбасын деп,

Тіл-жақ берді жаратқан тынбасын деп.

Үлкен ағай өлеңді көп үйреткен,

Тойға барып томпиып тұрмасын деп.

488 >>

Әриялар, ендеше, әриялар,

Қара ағаштың басына қарға ұялар,

Жақсысы бар өлеңнің, жаманы бар,

Қандай өлең айтамыз қариялар.

489 >>

Шай тостаған, ендеше, шай тостаған,

Бешпентім бар үстімде нарпостаған,

Арғы атамды сұрасаң қол бастаған,

Қолдан қиын болып па той бастаған.

490 >>

Шай-шай еткен, ендеше, шай-шай еткен,

Шай көйлектің жеңінен самал ескен,

Осы ауылдың ақыны бар деуші еді,

Көрінбеді көзіме, қайда кеткен.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі