БЕС АҒАШТАН ЕР ҚОСТЫМ ҚИЫСТЫРЫП

351 >>

Қара төбет қартайса қораға үрмес,

Жиналып кемпір мен шал дәурен сүрмес,

Ойнап-күл осындайда деп айтамыз,

Жиырма бес бір өткен соң қайта келмес.

352 >>

Қара таудың басынан қарай жаттым,

Қара айдарым беліме орай жаттым,

Құрбылардан айрылған қиын екен,

Жолаушыдан жол тосып сұрай жаттым.

353 >>

Қаратудың басында қиясы бар,

Мал жемейтін бір шөптің миясы бар,

Айт дегенде өлеңді іркілмеймін,

Таңдайымда жел сөздің ұясы бар.

354 >>

Қара таудың басында мұнарамын,

Түбінде мұнараның тұра аламын.

Жасымнан өлең айту дағдым еді,

Айтуға енді өлеңді ұяламын.

355 >>

Қара үй тұрар қалқайып қарашада,

Кисе киім жарасар аласаға,

Тапсаң тәуір өлеңнің тазасын айт,

Тыңдап көңіл көтерсін бала-шаға.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі