БЕС АҒАШТАН ЕР ҚОСТЫМ ҚИЫСТЫРЫП

341 >>

Өлеңді баста десең басы менде,

Майысқан балдырғанның жасы менде,

Қайтарып қара бұлтты қар жауғызған,

Жасынның шұбар ала тасы менде.

342 >>

Өлеңді баста десе бастаушы едім,

Басын айтып аяғын тастаушы едім.

Жел сөздің тәңір берген арқасында,

Өлең тұр ғой даудан да қашпаушы едім.

343 >>

Өлеңді айт дегенде дау бар ма екен,

Белбеусіз желбегейге бау бар ма екен,

Өлеңді айт дегенде қоя бермей,

Алдыңда аңталаған жау бар ма екен?

344 >>

Өлеңім он жасымда өрге жүзген,

Мамырлап қоңыр қаздай көлге жүзген.

Байлығы атамыздың сол емес пе,

Шығарған сүттен тоған іргемізден.

345 >>

Ауылым қонған жері ой болса екен,

Жайылған ойдан төмен қой болса екен.

Тағдырдан сұрайтыны көпшіліктің,

Бас қосар күнде осындай той болса екен.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі