БЕС АҒАШТАН ЕР ҚОСТЫМ ҚИЫСТЫРЫП

336 >>

Өлеңім ескен желдей, толқын көлдей,

Болмайды тойдың сәні ақын келмей.

Дүбірі ақын болса жер жарады,

Үдірген төс бастаудан саудагердей.

337 >>

Өлеңді айт дегенде аңырар ма,

Тойда өлең айтқан жігіт жаңылар ма,

Барында тіршіліктің ойна да күл,

Мереке күнде осындай табылар ма.

338 >>

Өлеңді айт дегенде аңырмаймын,

Аққудай көлге жүзген мамырлаймын,

Болғанда тілім – інжу, тісім – меруерт,

Болса да қандай ақын жаңылмаймын.

339 >>

Өлең-өлең дегенде өңейді екен,

Тамағын ақын жігіт кенейді екен.

Тойда өлең бұдан бұрын айтқаным жоқ,

Өлеңді баста десе не дейді екен?

340 >>

Өлеңді тіл бастайды, жақ қостайды,

Бәйгеден келсе жүйрік ойқастайды,

Берейін бастап-бастап баста десең,

Өлеңді біз бастамай кім бастайды.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі