БЕС АҒАШТАН ЕР ҚОСТЫМ ҚИЫСТЫРЫП

316 >>

Өлең деген қиын ба өнерпазға,

Өлең тұрмақ сөз қиын ақылы азға,

Көңілді көтерелік осындайда,

Кім бар, кім жоқ ендігі келер жазда.

317 >>

Өлеңді айта алмайды әркім мендей,

Табаны тарлан боздың гулер желдей,

Өлеңді айт десеңдер аңыратайын,

Көктеуге қой қоздатып көшкен елдей.

318 >>

Өлеңді айт дегенде іркілмеймін,

Жүніндей ақ үкінің үлпілдеймін,

Осындай игі жақсы бас қосқанда,

Алдыда желмей-жортпай бүлкілдеймін.

319 >>

Өлеңді айт дегенде іркілмеймін,

Кісіні өлең айтқан шіркін деймін,

Жел сөздің тағдыр берген арқасында,

Жорғадай жолға түскен бүлкілдеймін.

320 >>

Өлеңді тіл бастайды, жақ қостайды,

Бәйгеден жүйрік келсе ойқастайды,

Барында тіршіліктің ойна да күл,

Өлеңді біз тұрғанда кім бастайды.

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі