ТАБИҒАТҚА БОЛАДЫ ҰНАҒАНЫ

286 >>

Қалды кейін қайран ел туған жерім,

Аман да бол қайыр хош асқар белім.

Ата-анамның кезінде ізі қалып,

Ең алғашқы кіндік қан тамған жерім.

 

287 >>

Жайнап өскен жас шыбық доланасы,

Бал татыған шекерлі ақ алмасы,

Жатсам-тұрсам есімнен бір кетпейді,

Ақ бастаулар сылдырап сай-саласы.

 

288 >>

Су шығар жалбызы бар шилі жерден,

Сөз шығар естімеген үлгілі елден,

Сайрап қал қызыл тілім ел-жұртыңа,

Құтылған еш ақын жоқ қара жерден.

 

289 >>

Жер қайда Сәңкілкөлдей жайлағанға,

Шыңғыртып жас құлынын байлағанға,

Келмейді жатсам ұйқым, тұрсам күлкім,

Қалқаны кейін қалған ойлағанда.

 

290 >>

Қонғаны ауылымның жазық еді,

Ән-күйім көңілімнің азығы еді,

Жасымнан қол жетпесті армандатып,

Тағдырым әлденеге жазып еді.