ТАБИҒАТҚА БОЛАДЫ ҰНАҒАНЫ

251 >>

Қазықұртты жағалай тас болады,

Шын азамат еліне бас болады,

Көрінгенмен жылтырап сыртым бүтін,

Ішім жанып, көзіме жас толады.

252 >>

Ұлы жұртты жағалай тал болады,

Ашылмаса көңілің дал болады,

Қасіретті қайғысы басқа түссе,

Айдын көлге ақ үйрек зар болады.

253 >>

Өрмегейті, Қаракөл жердің туы,

Алтын бұлақ секілді аққан суы,

Ән дауысын сағынып жүргенімде,

Қай жеріңнен келеді әннің туы.

254 >>

Қара бұлт келеді меңдей болып,

Кескен терек қалады жеңдей болып,

Ауылың алыс кеткенде, беу қарағым,

Кім көрінер көзіме сендей болып.

255 >>

Жан сәулем, айға бітсе сендей көрік,

Дария тасып, тау балқыр тастар еріп,

Тамақтан үлбіреген бір иіскетсең,

Кетпей ме бойдан қуат, ойдан ерік.

баспаға әзірлеген             

Бегімхан Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі