ТАБИҒАТҚА БОЛАДЫ ҰНАҒАНЫ

186 >>

Ауылым көшіп барады көлмеккөлге,

Алыс дейді Көлмеккөл көрмегенге,

Алыс болса Көлмеккөл көрмегенге,

Күн жарқырап ай туар өлмегенге.

187 >>

Ауылым көшіп барады Алмалыға,

Кім көнбейді Алланың салғанына,

Кішкентайдан бірге өскен сәулем едің,

Екі көзің жәутеңдеп қалғаның ба?

188 >>

Ауылым көшіп барады таудан асып,

Таудан асқан бұлтпенен араласып,

Ауылың алыс кеткенде, беу, қарағым,

Әлдекімге кетерсің бауыр басып.

189 >>

Ауылым көшіп барады Сарымсаққа,

Шықпайды екен шыбын жан жалынсақ та,

Ешбір хабар келмейді қысы-жазы,

Сарғайып ақ жүзіңе табынсақ та.

190 >>

Ауылым көшіп барады ылай көлге,

Шағи бешпент жарасар қынай белге,

Ауылың алыс кеткенде, ей, қарағым,

Көз жасыңды көл қылып жылай берме.

баспаға әзірлеген             

Бегімхан Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі