ДҮНИЕ – БІР ҚИСЫҚ ЖОЛ БҰРАҢДАҒАН

161 >>>

Шіркін-ай, жаман қандай, жақсы қандай,

Барады өтіп өмір асыққандай,

Барында оралыңның ойна да күл,

Қара жер бауыры суық басып қалмай.

162 >>>

Қамыстың ат байладым сабағына,

Жігіттің жолдас болма жаманына,

Жігіттің жолдас болсаң жаманына,

Дұшпанның тастап кетер табанында.

163 >>>

Жігіттер, дәурен өтер, дәурен өтер,

Бәрі де бұл дүниенің әуре бекер,

Қаумалаған достарың сырт айналар,

Қадіріңе сүйген жар – сәулең жетер.

164 >>>

Жиырмаға жиырма бес жуық екен,

Ақ боз үйді көтерген уық екен,

Оралыңның барында ойна да күл,

Қара жердің бауыры суық екен.

ТАБИҒАТҚА БОЛАДЫ ҰНАҒАНЫ

165 >>>

Жазың салқын, ей, Алтай, қысың қырау,

Аққан өзен сылдырап бейне жырау,

Алтыбақан тербеген қыз-бозбала,

Жайлауымыз алтынкөл анда тұр-ау.

баспаға әзірлеген             

Бегімхан Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі