ДҮНИЕ – БІР ҚИСЫҚ ЖОЛ БҰРАҢДАҒАН

151 >>>

Аузыңды ашсаң көрінер маржан тісің,

Не демейді сыртыңнан дұшпан кісің?!

Десе десін сыртыңнан дұшпан кісің,

Білінбей ме досыңа еткен ісің.

152 >>>

Жүгірген құмнан құмға құмай тазы,

Жігітті малдың азы мұңайтады,

Жігіттер, малым аз деп мұңаймаңыз,

Бір күні өлім келіп шұнайтады.

153 >>>

Жігіт болсаң, жігіт бол көңіл ашар,

Өнер қуған жігіттен бәле қашар,

Өміріңді өткізбе түндей қылып,

Жігіттің де жігіті бір-ақ жасар.

154 >>>

Қиын екен жігітке жұртқа жақпақ,

Жақсы, жаман көңілін бірдей таппақ,

Қара қылды қақ жарып жүрсең-дағы,

Біреу даттап кетеді, біреу мақтап.

155 >>>

Сал кеуде сандуғаштай сайрап тұрған,

Меруерт тас Самарқанда жайнап тұрған,

Ағалар, топтан таңдап бір сұлу ал,

Тасындай диірменнің ойнап тұрған.

баспаға әзірлеген             

Бегімхан Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі