ДҮНИЕ – БІР ҚИСЫҚ ЖОЛ БҰРАҢДАҒАН

126 >>>

Басына Қаратаудың қақ тұрмайды,

Жігітті шалса қырсық бақ тұрмайды,

Басыңда бақыт-дәулет тұрған шақта,

Алдыңа әркім-ақ кеп тақсырлайды.

127 >>>

Қудым сені қара өлең бала жастан,

Дүниенің аз-көбіне қарамастан,

Оралыңның барында күліп-ойна,

Не келіп, не кетпейді ғазиз бастан.

128 >>>

Жақсы қандай, құрбылас, жаман қандай,

Жүйрік қандай, ойлашы, шабан қандай,

Жай білмейтін жаманмен болсаң жолдас,

Қараңғы үйдің ішінде қамалғандай.

129 >>>

Сулық қайда, жігіттер, сұр шекпендей,

Кей жігіттің мінезі тай тепкендей,

Оралыңның барында ойна да күл,

Жастық көңіл болады су сепкендей.

130 >>>

Би болмас белін жалпақ буғанменен,

Ағармас қас қараны жуғанменен.

Білгенге ақыл басқа, ажар басқа,

Не пайда өте әдемі туғанменен.

баспаға әзірлеген             

Бегімхан Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі