ДҮНИЕ – БІР ҚИСЫҚ ЖОЛ БҰРАҢДАҒАН

111 >>>

Бір бешпентім үстімде қара мақпал,

Оны қиған қайшыны Ана мақтар,

Дүниенің қызығы ойнап-күлген,

Төрт бұрышын әлемнің аралап қал.

112 >>>

Біздің заман қай заман, жақұт заман,

Еңбекшіге әперген бақыт заман,

Құлшылықтың құтылып бұғауынан,

Айға ұмтылып биікке бастық қадам.

113 >>>

Өткен заман қай заман, жылан заман,

Жылан шағып, халық жоқ жыламаған,

Боз інгеннің бөрі жеп боташығын,

Ер жігітке мал мен бас құралмаған.

114 >>>

Жігіті біздің елдің сылқым сері,

Күнде той ойын-күлкі жүрген жері,

Асыр сап құлын-тайдай ойнақтаған,

Әркімнің өзіне ыстық туған жері.

115 >>>

Үйір болдым жел сөзге жасымыздан,

Жақсы болсақ кім кетер қасымыздан,

Құмға айдаған жылқының мұнарындай,

Өмір өтіп барады басымыздан.

баспаға әзірлеген             

Бегімхан Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі