ДҮНИЕ – БІР ҚИСЫҚ ЖОЛ БҰРАҢДАҒАН

26 >>>

Дүние ойлап тұрсам шолақ екен,

Қарағай ьасын кессе мол-ақ екен,

Он бес пен жиырма бес, қайран отыз,

Үшеуі үш күн қонған қонақ екен.

27 >>>

Дүние-ай, ойлап тұрсаң – шекер дүние!

Байға қызық, жарлыға бекер дүние,

Барында оралыңның ойна да күл,

Опасыз бір күн тастап кетер дүние.

28 >>>

Дүние келерінде бұлақтайсың,

Сырғыған кетеріңде сынаптайсың,

Жанына жақсылардың аялдамай,

Па, шіркін, қайда барып тұрақтайсың!

29 >>>

Балыққа су ішінде дем болмайды,

Етінде сұлу қыздың мең болмайды,

Жарыңыз қойныңдағы жаман болса,

Дұшпаннан қылыш тартқан кем болмайды.

30 >>>

Шыназ қала дегенде Шыназ қала,

Айналатын Шыназды су азғана,

Оралыңның барында ойна да күл,

Өлшеп берген өмірдің күні азғана.

баспаға әзірлеген             

Бегімхан Ибрагим (КЕРІМХАНҰЛЫ)

Ақсу қаласының №2 ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі