ҒАШЫҚТЫҚ СҰЛУЛЫҚТЫ ТАЛҒАМАЙДЫ

891 >>

Ақ үйдің ай көрінер маңдайынан,

Шешеннің бал тамады таңдайынан,

Дүниеде сенен артық жан көргем жоқ,

Адамның жаратылдың қандайынан.

892 >>

Басқұрдың бас айналар термесінен,

Қасыңның хат жазамын кермесінен,

Сұңқылдап жатсам-тұрсам сізді тілеп,

Алланың сұрап алам бермесінен.

893 >>

Қар жауар қарашада қатқақ болып,

Қалады жаңбыр жауса батпақ болып,

Қалқатай отыр ма екен, жатыр ма екен,

Сұңқардай үш түлеген аппақ болып.  

894 >>

Жүгірер қойдан қойға шұбар туша,

Көрінер қыздар сұлу белін буса,

Алдына есігіңнің су төгіп қой,

Жығылсын әкең тайып мені қуса.

895 >>

Ұшады көк ала үйрек көл дегенде,

Құриды ынтызарым сен дегенде,

Кеткенде ауылың алыс, ей, қарағым,

Бал татыр сілекейің шөлдегенде.

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі