АҒЫЛШЫН ТІЛІ

IELTS 7.5

Мамандардың айтуынша, Listening және Reading бөлімдері өте оңай, сондықтан сол екі бөлімде максимумды сығып, жоғары балл алып қалуға барынша әрекет ету керек. Ортақ нәтижеге үлкен әсерін тигізеді. Writing бөлімінде сөздердің қатесіз жазылуына, сөйлемдердің құрылымына және сөз мөлшеріне мән беріледі. Speaking бөлімінде сіздің ойыңызды еркін жеткізуіңізге, қобалжымауыңызға, тақырыпты аша білгендіңізге қарайды.

Ол өз нәтижесімен бөлісіп, осыны жазудағы мақсаты – енді тапсырайын деп жүрген немесе болашақта тапсыруды көздеген адамдарға бағыттаушы, жол көрсетуші болсақ екен дейді.

IELTS – асылы бір ай қалғанда дайындалып, апыр да топыр өтіп кете салатын нәрсе емес. Оған дейінгі жүріп өткен жолыңыз маңыздылыққа ие. Егер қазір мектеп оқушысы болсаңыз, өз келешегіңізді халықаралық қатынастар бағытында елестетсеңіз, ағылшын тілін дұрыс меңгеруді қолға алыңыз. Басқа қандай да бір мамандықтың өкілі болыңыз, мейлі, ағылшын тілін жетік білу – мүмкіндіктерді кеңейте түседі. Дін саласының маманы болсаңыз да, ағылшын тілін білу еш артық емес. Қосымша ақпарат көздерін өз бетіңізше ашып қарай аласыз, әлем мұсылмандарымен байланыса алатын боласыз.

Оны анасы 10 жасынан тілдік мектепке беріп, бала кезден осы нәрсеге бейімдеді. Бір маусымда Beginner мен elementary деңгейлерін Successfully тәмамдап, келесі маусымда Pre-Intermediate, одан кейінгі маусымда Intermediate деңгейлеріне жеткен болатын. Бүкіл емтихандарды Successfully жауып, мектеп бітірерде үзілді-кесілді ағылшын тілін таңдап, Халықаралық қатынастар мамандығына түсемін деп бел буды.

Университетке қазіргі мамандығына түскен кезде, ағылшын тіліндегі сабақтарда көп қиындық көрмейтін. Ағылшын тілін білетін оқушылардың ағылшын тілін білмейтін оқушыларға қарағанда әлемдік ақпараттарға қолжетімділігі жоғары болатын.

Университетті (бакалавр) бітіргенде ағылшын тілі деңгейі Upper-Intermediate болды. IELTS алғаннан кейін ол көрсеткіш Advanced болып өзгерді. Қазіргі таңдағы ағылшын тіліндегі активті сөздік қоры – 8000 сөзді құрайды.

Егер университетке енді түскен болсаңыз, сабақтарыңызды жақсы оқыңыз. Университеттің ұсынатын қосымша Speaking Club сынды мүмкіндіктері болады. Соларды пайдаланып, уақытыңызды бос өткізбеуге тырысыңыз. Оның өзге шығыс тілдерін оқуы, басқа да шет тілдеріне, ана тіліне ешқандай зиянын тигізген жоқ. Керісінше, ана тілі білімі, шет тілдер білімі күшейе түсті.

Ағылшын тілін білетін адамдарды көрсеңіз сөйлесуге ұялмаңыз. Студент кезде қателесіп қалыңыз. Сөйлемеген адам қателеспейді. Алайда студенттік шақта сөйлеп, қателесіп, қателеріңізді туралап алыңыз.

IELTS-тан жақсы балл алудың бірден-бір жолы – ағылшын тілін жақсы оқу. Ол нәрсе тек IELTS-тан жақсы балла алу үшін ғана емес, өзіңіздің өмірлік қамыңыз.

IELTS нәтижесін қолдан жасатып ала алмаймыз немесе сатып ала алмайсыз. Жақсы нәтиже үшін оқу керек. Келешек бүгіннен бастау алады. Біздің ұтылатын бір тұсымыз – тақалған кезде ғана ойлануымыз. Мамандық таңдайтын бала 11-сыныпқа келіп  «Не таңдасам екен?» деген сұрақтар аясында ізденеді. Оқу бітірген адам бір жұмыс орнына кірейін десе, ол жұмыс орны одан ағылшын тілін білуді сұраса, сол кезде барып оқуға кірісіп жатады. Иә, әркімге әрқалай бұйырады. Ешкімді айыптау, күстаналау жоқ. Тек бүгінгі келбеті тез өзгеріп жатқан дүниені есепке алып, шамамен өзіңізді бірнеше жылдан кейін кім ретінде көргіңіз келетіні туралы ой жүгіртіп, әрекетін алдын-ала жасау керек.    (жалғасы бар)  

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі