ИСЛАМДА ЖАН САУЛЫҒЫНА ҚАТЫСТЫ ПРАКТИКАЛЫҚ ӘДІС-ТӘСІЛДЕР

2. Адамның өзге адамдармен және қоршаған ортамен болған қарым-қатынасы

Өзгелермен қарым-қатынаста бір жақты талап

Кейде адам басқалармен қарым-қатынаста бір жақты талаптың шеңберінен шыға алмай қалады. Яғни адамның бәрін өзіне қамқорлық жасауға, мейірім танытуға, көмектесуге міндет секілді сезінеді. Бірақ өзін бұл міндеттің аясына кіргізбейді. Бұл – адамның өз ақиқатын тани алмағандығының белгісі. Себебі өз ақиқатын тапқан адам біреуге кіріптар болуды қаламайды және ешкімге міндетсінбей-ақ, өз өмірін өзі ретке келтіреді.

Қарым-қатынас мәселесінде бір жақты талап пен өзгені міндеттеу – бірінші кезекте адамның өзіне зиян. Мұндай адам өзін психологиялық қапасқа қамап қояды. Бұдан құтылудың төте жолы – өзгелер алдындағы жауапкершілікті сезіну.