ШАҢЫРАҚ КӨТЕРУ

Шаңырақ көтеру /салт/. Жас отаудың алғаш рет шаңырағын көтерудің өзі қазақ үшін тағы бір қызықты, ерекше сәт. Мұны қазақ салт-дәстүрін жетік білетін белгілі этнограф-жазушы Ахмет былай деп жазған: «... қазақта отаудың шаңырағын албаты адам көтермейді. Бұған баласы көп, кәрі күйеу керек. Оны қос атпен болса да алғызады. Ыңғайлы жер болып, отау өте үлкен болса кәрі күйеу шаңырақты аттың үстінде тұрып көтереді. Бұл еңбегіне ол не ат мінеді, не түйе жетектейді. Бұған малды отауды көтерткен жақ береді. /А.Жүнісов «Фәниден бақиға дейін»/. Әдетте киіз үйдің шаңырағын ер адамдар көтереді. Ал, жас отаудың шаңырағын кәрі күйеуге көтертуде үлкен мән, ырым бар. Өйткені «жүзден үлкен күйеу» қашан да елге сыйлы және тілектес адам. Және күйеу қартайған сайын қайын жұртына қадірі, сыйы арта түседі. Қазақ елі осы жолдан әлі айрылған жоқ. Кәрі күйеу келсе ауылдың үлкен-кішісі, еркек-әйелі онымен бір қағыспай қалмайды. Оның шаңырақ көтеруінде де осындай терең сыйластық бар.