Жаңалық ашайын деп тұрған жоқпын. Демек, қазіргі кезде көркем шығарма оқуды былай ысырып қойып жүрген өскелең ұрпақ жайы алаңдатады, ағайын. Боймен бірге ойы қатар жетілмесе, қарапайым адами қадір-қасиет қайтіп қалыптасады?! Ауыл кітапханасыда болсын, мектеп кітапханасында болсын көркем шығармалар самсап тұр. Ал оны алып оқып жүрген оқушы қатары некен-саяқ. Сонда-ау сондайма рухани құндылықтар жай сән үшін берілген бе? Діттеген мәнін қайдан іздейміз? Жұрт алдында сөйлеуде бір-екі сөздің басын құрастыра алмайтын сөйлеуші айтар ойын жеткізуде кесек-кесек кедергілерге ұшырайтыны өз алдына, тығырыққа тірелудің қиындығына тап болады. Айталық, сабақ үстінде болсын, жай кезде болсын оқушы қауыммен әңгімелескен сәтте олардың тілдік қорының тым жұпыны екенін байқап қалсаң, өз-өзіңнен қуыстанады екенсің. Ұзын сөздің қысқасы, рухани қорды жетілдіретін, жаңартатын һәм жаңғыртатын уақыт әлдеқашан жетті. Қапы қалмайық, ағайын. Сыныптан тыс уақыттарда, сабақтан және жұмыстан босаған сәттерде күнделікті я апталық бұқаралық ақпарат құралдары өз алдына, бойында тағылымдық-тәрбиелік жүк арқалаған әдеби-танымдық, көркем-имандылық кітаптарды оқуға бет бұрғанымыз абзал. Нәтижесі опық жегізбейтініне көзіңіз жетеді. Керісінше ойыңыз өседі, парасатыңыз жоғарылайды, көзқарасыңыз алға қарай жетелейді. Іске сәт! ШАҺМАНТЕГІ-ИБРАҺИМ Бегімхан КЕРІМХАНҰЛЫ