БАТА-ТІЛЕКТЕР

Төле би Әлібекұлы

Аллаға жағайын десең,

Азанды бол, балам!

Халыққа жағайын десең,

Қазанды бол, балам!

Жаңбыр жаумаса жер жетім,

Басшы болмаса ел жетім,

Ұқпасқа айтқан сөз жетім...

Атың жақсы болса,

Ер жігіттің пырағы,

Балаң жақсы болса,

Жан мен тәннің шырағы.

Әйелің жақсы болса,

Бірінші – иманың,

Екінші – жиғаның,

Үшінші – ырысыңның тұрағы...

* * *

Төле биге Қарасай батырдың берген батасы

Қарағым, Төле, айтқаның әділ болсын,

Тілегің қабыл болсын.

Дұшпаныңның қарғысы жетпесін,

Атқан оғы өтпесін.

Басыңнан бақыт кетпесін.

Бабам Бәйдікбектің батасы, жауыңнан қорғап, септесін.

Қасыңдағы жолдасыңа берекең артып жүрсін,

Дұшпаның өзіңе қорғалап,

Досың болып, басын тартып жүрсін.

Көзіңді жақынға салма, алысқа сал,

Ниетіңді қалысқа сал.

Сыйынғанға кие бол,

Халқыңа ие бол!

Әумин!

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі