БАТА-ТІЛЕКТЕР

Халық бата-тілегі

Мал-жанға берілетін баталар

Е, Құдайым, жарылқа!

Жарылқасаң малды қыл!

Біткен жұрттың алды қыл!..

Е, Құдайым, бала берсін!

Мал мен басты және берсін!

Саған қас қылған дұшпанды

Табаныңның астына сала берсін!

Аллауакбар!

* * *

Қозыға толсын көгенің,

Уыз болсын жегенің.

Құтты болсын құрығың,

Тартылмасын құдығың.

Қияқты болсын сұңқарың,

Тұяқты болсын тұлпарың.

Өрісті болсын жайлауың,

Ырысты болсын қыстауың.

Арыстандай болсын айбатың,

Жолбарыстай болсын қайратың.

Гүлге толсын өңірің,

Көңілді өтсін өмірің.

Асқа толсын табағың,

Ашық болсын қабағың!

Әумин!

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі