БАТА-ТІЛЕКТЕР

Халық бата-тілегі

Әумин десең бердім бата

Қабыл етіп бір Аллаһ

Бақ-дәулет, берекет

Үйіңізге ұяласын.

Жаратқан Ием аман қылсын

Бізге берген шайыңыз –

Жақсы болсын жайыңыз.

Бізге берген етіңіз –

Қабыл болсын ниетіңіз.

Мақсатыңа жетіңіз,

Бізге берген тұз-дәміңіз

Таусылмайтын несібе болып,

Аман-сау болайық бәріміз.

Әумин, Аллауакбар!

* * *

Иә, Тәңірі құдірет,

Мал-бастарын аман ет,

Басына бер бақыт,

Асына бер берекет,

Өмір-жасын ұзақ ет,

Михнаттан аман ет,

Дұшпанының күнін жаман ет,

Ұрпақтарын асыл ет,

Дүниедегі жақсылықты,

Дәл осы үйге нәсіп ет!

Жас баланың күлкісін бер,

Жас ананың ұйқысын бер.

Жомарттың қолын бер,

Жорытқанның жолын бер.

Қыздың қылығын бер,

Судың тұнығын бер,

Асаудың арынын бер,

Түнгі оттың жарығын бер.

Асқар таудың паңдығын бер,

Бұлбұл құстың таңғы үнін бер.

Даланың жазықтығын бер,

Гүлдің нәзіктігін бер.

Теңіздің тереңдігін бер,

Қыранның көрегендігін бер.

Ердің көңілін бер,

Бүркіттің жігерін бер.

Лашынның жүрегін бер,

Нағыз достың тілегін бер.

Мәңгі-бақи ажырамас,

Шын ғашықтың тілегін бер!

Дастарқаныңа береке берсін,

Бастарыңа мереке берсін,

Астарыңа адалдық берсін,

Бастарыңа амандық берсін,

Дендеріңе саулық берсін!

Әумин!

баспаға әзірлеген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі